TALLER SENSORIAL FRUTÍFERO - 4 ANOS B

Á volta das vacacións de Semana Santa, o alumnado de 5º de Educación Infantil B, comezamos a traballar o continente de Oceanía. En base a iso, o pasado xoves 4 de abril, realizamos un taller sensorial coa fin de descubrir, por medio da estimulación dos sentidos (especialmente tacto, gusto e olfato), diferentes froitas típicas de alí. Así poidemos experimentar o olor, o sabor e o tacto de alimentos como o coco, a piña e o plátano; entre outros. Ata descubrimos un cereal intruso: o arroz! Finalmente, profundamos na importancia da inxesta destes alimentos para o noso organismo. 

ALIMENTACIÓN SAUDABLE_ 4ºA

 O alumnado de 4º A, en relación ao proxecto "Aliméntate ben", na área de Ciencias da Natureza e de Educación Plástica, realizou dúas actividades relacionadas coa alimentación saudable. 

ACTIVIDADE 1: PRATO DE HARVARD

Cada alumno/a da clase deseñou o seu prato de Harvard. A través deste método distribuimos de forma equilibrada todos os alimentos. Dividimos o prato en tres partes: 50% verduras, hortalizas e froitas, 25% proteínas e 25 % hidratos de carbono. 

ACTIVIDADE 2: CLASIFICACIÓN DE ALIMENTOS

Elaboraron na clase un mural sobre os alimentos. Nel aparecían os alimentos clasificados segundo a súa orixe, a súa función e os tipos de alimentos. Para a súa preparación escollimos imaxes de diferentes folletos de supermercados co obxectivo de relacionar esta actividade coa súa vida real. Agora, son capaces de identificar os alimentos saudables e os ultraprocesados. 

PRATO DE HARVARD_4ºB

O alumnado de 4ºB deseñou o seu "Prato de Harvard", unha forma de crear comidas saudables e proporcionadas. Desta maneira, recórdasenos que no noso prato, a metade deben ser froitas e verduras, unha cuarta parte hidratos de carbono (favorecendo os grans integrais) e outra cuarta parte proteínas. Debemos procurar usar aceites vexetais saudables, como o aceite de oliva e beber auga suficiente, procurando eliminar da nosa dieta as bebidas azucaradas.

Neste collage queda unha pequena mostra de catro pratos saudables.

CLASIFICAMOS OS ALIMENTOS_4ºB

O alumnado de 4º B, realizou este mural onde aparecen os alimentos clasificados segundo a súa orixe, a súa función e como se prepararon antes de consumilos. Chegamos á conclusión de que debemos evitar os alimentos ultraprocesados e procesados e mirar de consumir os alimentos que case non foron manipulados. 

PIRÁMIDE DOS ALIMENTOS (3º B)

 Aproveitando a reciclaxe dos folletos dos supermercados, reutilizámolos para recortar diferentes

 alimentos e compoñer así a "Pirámide Alimenticia".

Aprendemos en que consiste unha pirámide de alimentos e cales son as racións recomendadas de cada un.

Quedounos así de bonita!

ALIMENTACIÓN SAUDABLE (3º B)

 Os rapaces e rapazas de 3º B elaboraron este mural de aula, por grupos.

Un grupo encargouse de completar o "Encrucillado alimentario", outro de reconstruir o "Nutriplato" e o outro grupo de conseguir chegar á meta do "Laberinto dos alimentos".

A FESTA DO QUEIXO

 Cada ano, na primeira fin de semana do mes de marzo celébrase en Arzúa a Festa do Queixo. 

Con este motivo, parte do alumnado do Ciclo de EI da EFA de Arzúa veu á nosa aula de 5 Anos A do CEIP de Arzúa para falarnos sobre as vacas e a súa importancia na paisaxe, na economía e na alimentación en Galicia.

Todo isto fixérono mentras xogamos ao "Twister do Queixo" e decoramos uns debuxos dunhas vacas.

E déronnos unhas medallas por facelo tan ben! 

LIBRO DE RECEITAS CREATIVAS E SAUDABLES

 O alumnado de 6°A de Educación Infantil do CEIP de Arzúa realizou coas súas familias un libro con receitas saudables e con xeitos creativos e divertidos de presentacións para servilas na mesa.

Aquí déixovos unha pequena mostra do traballo. Podedes velo enteiro na bibblioteca do noso centro.

Bo proveito! 

SOPAS DE LETRAS SOBRE HÁBITOS E ALIMENTACIÓN SAUDABLE (3º B)

 O alumnado de 3º B realizou, por grupos, cinco SOPAS DE LETRAS na que os demais compañeiros e compañeiras deberán atopar 8 palabras relacionadas coa boa alimentación e hábitos saudables.

As sopas de letras teñen os seguintes títulos:

- Deportes.

- Alimentación.

- Diversión.

- Froitas e verduras.

- Hábitos saudables.

BINGO DE ALIMENTOS EN 3ºB

 O alumnado de 3º B fixemos un bingo con diferentes alimentos e pasamos un rato moi divertido xogando.

PRATOS TÍPICOS GALEGOS (alumnado de 3ºB)

 Os rapaces e rapazas de 3º B fixeron estes murais relacionados cos pratos típicos de Galicia e os nosos mariscos.

Plasmaron nun mural as imaxes destas comidas tradicionais das nosas cociñas e rotularon os seus nomes.

"A FESTA DO QUEIXO" - 4 ANOS A e B

O xoves 29 de febreiro, con motivo da celebración da Festa do Queixo na nosa vila (Arzúa), os nenos/as de 4 anos recibimos nas nosas aulas aos alumnos/as do ciclo de Educación Infantil da EFA Piñeiral. Grazas á súa visita adquirimos moitos coñecementos sobre o queixo: a familia de alimentos á que pertence, o seu proceso de elaboración e os ingredientes imprescindibles para levalo a cabo, denominacións e diferentes etiquetados. Todo isto, facendo especial fincapé nun derivado lácteo de gran importancia: o queixo Arzúa-Ulloa. 

Pasamos unha divertida mañá xa que ao longo da visita puidemos desfrutar de contos, actividades interactivas, cancións e bailes. 

PAZ FRUTÍFERA

 Os nenos e nenas de 3°, 4°, 5° e 6° de Educación Primaria do CEIP de Arzúa, co motivo do Día da Paz, fixeron na clase de Relixión un mural moi "froiteiro" que titularon "Paz Frutífera", con debuxos de froitas e palabras relacionadas coa paz.

Neste traballo quixeron amosar que para acadar a Paz temos que alimentala de froitas que conteñan  un importante aporte vitamínico de respecto, perdón, xenerosidade, bondade...e con un alto contido na fibra do Amor cuxo principal beneficio é o mellor funcionamento do noso  mundo.

Animámosvos a consumir estas saborosas e saudables froitas que vos darán moita enerxía positiva e traerán moita Paz ás vosas vidas.